Саудия Арабистони Ташқи ишлар вазири Файсал ибн Фарҳон Афинага ташрифи чоғида грециялик ҳамкасби Никос Дендиас билан учрашди. Би-би-си хабарида айтилишича, музокаралар якунида баёнот берган Дендиас Туркиянинг устидан шикоят қилди.
Вазирлар икки давлат ўртасида мудофаа, иқтисодиёт, инвестиция, маданият соҳаларида ҳамкорлик масалаларидан ташқари Шарқий Ўрта ер денгизидаги ва Форс кўрфази мамкатларидаги вазиятни кўриб чиқди.
Никос Дедиас Туркиянинг минтақада “мисли кўрилмаган даражада тажовузкор сиёсат” олиб бораётганини таъкидлади. У мисол тариқасида Туркия Ташқи ишлар вазири Мевлут Човушўғли ва Мудофаа вазири Хулуси Акарнинг Эгей денгизида Грецияга қарашли оролларни қуролсизлантириш ва уларга эгалик масаласини қайта кўриб чиқиш ҳақидаги сўзларини келтирди.
“Греция уруш таҳдиди остида”, – деди Никос Дендиас.
Унинг айтишича, “ҳар доим халқаро қонунларни ҳурмат қилишини айтадиган Туркияни буни амалда исботлаши зарур”.
Файсал ибн Фарҳон эса Дендиаснинг шикоятларига жавобан ҳам Греция, ҳам Саудия Арабистони минтақада тинчлик ва барқарорликнинг таъминланиши учун халқаро қонунларни ҳурмат қилишини айтиш билан кифояланди.
