Греция бош вазири Кириакос Мицотакис камида 38 кишининг ўлимига сабаб бўлган икки поезднинг тўқнашуви инсон хатоси эканини тан олди. Бу мамлакатдаги энг катта темир йўл фожиаси бўлиб, оқибатда транспорт вазири истеъфога чиқди.

Сешанба куни кечки пайт марказий Ларисса шаҳри ташқарисида пойтахт Афинадан Салоникига кетаётган йўловчи поезди шимол тарафдан келаётган юк поезди билан тўқнашиб кетган.

Тўқнашув натижасида йўловчи вагонининг бир қисмида ёғин келиб чиққан.

"Ҳамма нарса шуни кўрсатадики, фожиа инсоний хато туфайли содир бўлган", деди бош вазир Мицотакис чоршанба куни телевидение орқали қилган чиқишида.

Темир йўл оператори Hellenic Train'нинг айтишича, маҳаллий вақт бўйича соат 19:22да Афинадан жўнаб кетган йўловчи поездида 350 га яқин одам бўлган.

Греция транспорт вазири Костас Караманлис ҳалокат жойига борганидан сўнг истеъфога чиқиши шартлигини ўзи тан олган.

"Қайғуни таърифлашга тил ожиз. Бу каби фожиали воқеа содир бўлганидан гўё кейин ҳеч нарса бўлмагандек ишда давом этиб бўлмайди", деди у.

“Мамлакатимиз фуқароларининг сиёсий тизимга ишонишини демократиямизнинг зарурий элементи, деб биламан. Бу сиёсий жавобгарлик деб аталади”, дея қўшимча қилди у. 

Ҳалокатда камида 66 киши жароҳат олган, улардан олти нафари реанимацияда ва 250 га яқин йўловчи енгил жароҳатланган. Улар автобусда 130 километр узоқликдаги Салоникига эвакуация қилинган.

"Биз катта портлашни эшитдик, бу 10 сонияча давом этди", деди вайроналар остидан омон чиққан 28 ёшли йўловчи Стергиос Миненис.

"Биз вагон ағдарилиши билан ёнбошга йиқилдик. Кейин ваҳима бошланди, кабеллар ёниши оқибатида ҳамма жойга тезда ўт кетди. Вагон қулаганидан кейин ўнг ва чап томонимиз аланга олди", деди жабрланувчилардан бири.

Воқеа жойида қидирув-қутқарув ишлари давом этмоқда.