Германиянинг Гармиш-Партенкирхен шаҳрида кеча, 26 июнь куни бошланган G7 саммитига қарши норозилик намойиши ўтказилди.

Полиция маълумотларига кўра, унда 900 киши иштирок этган. Ташкилотчиларнинг айтишича эса, 1000 дан ортиқ намойишчи ўз норозилигини билдирган.

Мазкур тадбир “Стоп Элмау” ташаббус гуруҳи томонидан ташкил этилган. 

Намойишчилар қашшоқ мамлакатлар қарзларини бекор қилишни, G7ни тугатишни ва глобал муаммоларни ҳал қилишда Бирлашган Миллатлар Ташкилотининг ролини оширишни талаб қилишди. 

Полиция ходимларини ҳақорат қилган намойишчи ҳибсга олингани ҳақида хабар берилган. 

26 – 28 июнь кунлари Баварияда, Алп тоғларидаги Элмау қасрида Германия давлати раислигида G7 нинг 48-саммити бўлиб ўтади.