Германиядан бошпана сўраган юзлаб афғонистонлик қочқинлар ўз мамлакатида давом этаётган можаролардан қочган кўп сонли украиналиклар келганидан сўнг бошқа жойларга кўчирилмоқда.

Ўтган ҳафта Foreign Policy ҳисоботига кўра, кўплаб афғонлар Германия расмийларидан кўчирилганлиги ҳақида огоҳлантирилган, баъзилари эса хабарни 24 соатдан камроқ вақт олдин олган. 

 «Кўчиришлар қасддан яширилган. Йиллар давомида ўз уйларида яшаган одамлар, ижтимоий тузилмаларидан ажралган, жумладан, болалар ўз мактабларидан узоқроқ жойларга кўчирилган», - дейди Берлин қочқинлар кенгаши бошқаруви аъзоси Ториқ Алаовс.

Хабарга кўра, кўчириш қарори Берлин Сенатининг Интеграция, меҳнат ва ижтимоий хизматлар департаменти томонидан қабул қилинган бўлиб, у «оператив зарурий ва мураккаб мулоҳазалар асосида» бўлгани ва украиналиклар ичида кўплаб болали аёллар ҳам борлиги сабабли муқобил вариант йўқлигини билдирган.

 «Бу афғон оилалари учун қўшимча қийинчиликларга сабаб бўлганидан, кишилар ўз таниш муҳитини тарк этишга мажбур бўлганидан афсусдамиз. Энди уларга ўзларининг ижтимоий алоқаларини сақлаб қолиши қийин бўлиши мумкин», деган департамент матбуот котиби Стефан Штраус.

Унинг қўшимча қилишича, Берлинда жами 83 хил қочқинлар тураржойлари мавжуд бўлиб, уларда 22 мингга яқин одам истиқомат қилади. Бироқ, украиналикларнинг кўплаб келиши билан, қочқинларни рўйхатга олишни соддалаштириш учун уларни бир нечта марказларга бирлаштириш керак эди.

Штрауснинг айтишича, кўчирилган афғонларга умумий ҳаммом ва ошхонадан ташқари шунга ўхшаш сифатдаги бошқа «доимий» уйлар берилган.

Бироқ, ижтимоий ишчилар ҳукуматнинг афғонларга Яқин Шарқ ва Шимолий Африкадан келган қочқинларга муносабатидан норозилигини билдирди.

Ҳисоботда қўшимча қилинишича, Германиядаги бошпана изловчиларнинг аксарияти уларга вақтинчалик яшаш жойини тақдим этувчи бошпана тизимига киришади ва ҳар олти ойда бир марта кўриб чиқилади. 

2021 йил август ойида Афғонистон “Толибон” томонидан эгалландан сўнг Германияга келган афғонларнинг аксарияти дарҳол уч йиллик яшаш учун рухсатнома олган.

Россиянинг Украинага бостириб кириши олдидан ва 2015 йилда чегараларини асосан Суриядаги можародан қочган одамлар учун очгач, Германия 1,24 миллиондан ортиқ киши билан Европанинг энг йирик қочқинларни қабул қилган давлатига айланди. Бугунги кунда унинг ўрнини 2,8 миллион украиналик қабул қилган Полша эгаллади.