Умм-Ал-Фаҳм шаҳридан бўлган фаластинлик журналист ўз машинасида отиб кетилди. Гувоҳларнинг сўзларига кўра, ниқобда бўлган икки эркак Надаль Ижбарияга яқин масофадан ўқ узган.
Журналист Афулдаги шифохонада вафот этган. The Jerusalem Post газетаси маълумотларига кўра, Исроил ҳукумати ҳодиса юзасидан текширув ўтказишни бошлаган.
44 ёшли Ижбария Sawt Al-Haq wa Al-Huriyeh нашри учун мақолалар ёзган ва Baladna веб-сайти асосчиси бўлган.
“Ҳақиқат овози ўчмайди”, – деб ёзган веб-сайт ўзининг Facebook саҳифасида. Қўшимча қилинишича, марҳум масжиддан уйига қайтишда ўлдирилган.
New Arab нашри билан суҳбатда журналистнинг оила аъзолари қотилликда Исроил ҳукуматини айблаган. Марҳум ўлимидан бир неча кун олдин таҳдидга учраган. Полиция бу ҳақда билган, аммо жиноятнинг олдини олмаган.
Ижбариянинг отаси ҳам полицияни ҳаракатсизликда айбламоқда.
Исроил ҳудудида Нақбадан сўнг кўплаб фаластинликлар қолиб кетган ва улар мамлакат аҳолисининг 20 фоизини ташкил этади. Сўнгги вақтларда бу ҳудудларда жиноятчилик кескин ошди, аммо тез-тез ўзгариб турадиган Исроил ҳукумати бунинг олдини олиш учун ҳеч нарса қилмаяпти.
Умм-ал-Фаҳм маҳаллий ҳокимияти қотилликни қоралади ва исроилликларни жиноятни фош этишга чақирди.
