Эронда Украина самолётининг уриб туширилишига алоқадорликда гумон қилинган бир неча киши ҳибсга олинди, дея хабар бермоқда DW.
Олий суд вакили Ғулом Ҳусайн Исмоилийнинг айтишича, Украина самолётининг ҳалокати бўйича суриштирув ишлари бошланғич босқичда кетяпти. У ҳибсга олинганларнинг исм-фамилиясини ошкор этишни истамади.
Аввалроқ Эрон президенти Ҳасан Руҳоний самолётнинг уриб туширилиши ҳодисаси бўйича махсус суд ташкил этилишини билдирган эди. Президент Теҳрон яқинида юз берган ҳалокатни “оғир ва кечириб бўлмас хато” деб атади.
Эслатиб ўтамиз, «Украина халқаро авиалинияси»га қарашли Boeing 737-800 йўловчи самолёти 8 январь куни эрталаб Теҳрон аэропортидан кўтарилганидан кўп ўтмай уриб туширилди. Самолёт бортидаги 176 кишининг бари ҳалок бўлди. Эрон бир неча кун кейин Украина самолёти уриб туширилганини расман тан олди.
