Эрон ташқи ишлар вазири Муҳаммад Жавод Зарифнинг айтишича, Канаданинг уриб туширилган самолёт йўловчиларнинг оилалари учун компенсация ҳақидаги даъвоси ҳуқуқий асосга эга эмас. Бу ҳақда News.co.il нашри хабар бермоқда.
Украинага қарашли йўловчи самолёти 8 январь куни Теҳронда ҳалокатга учради ва бортдаги 176 кишининг бари ҳалок бўлди. Эрон аввалига ҳодисага техник носозлик сабаб бўлганини айтса-да, кейинроқ самолётнинг янглишлик билан уриб туширилганини тан олди.
Ҳалок бўлганлардан 57 нафари Канада фуқаролари эди, уларнинг аксарида Эрон фуқаролиги ҳам бўлган. Теҳрон икки фуқароликни тан олмайди, шунинг учун ҳам ҳалок бўлган бу кишиларни эронлик деб ҳисобламоқда.
Канадалик ҳуқуқшунослар қурбонлар оилалари номидан судга мурожаат қилиб, Эрондан 1,1 миллиард доллар ундирилишини талаб қилган.
Аввалроқ Эрон Украинага ҳар бир ҳалок бўлган фуқароси учун 80 минг доллар компенсация таклиф қилганди. Бироқ Украина томони бу суммани кам деб ҳисоблади ва таклифни рад этди.
