Эрон Ислом инқилоби қўриқчилари корпуси янги “Фаттоҳ” гипертовушли ракетасини намойиш қилди.
Ракета тақдимоти маросими Теҳронда бўлиб ўтди. Тадбирда Эрон президенти Иброҳим Раисий, ИИҚК қўмондони генерал-майор Ҳусайн Саламий ва Аэрокосмик кучлари қўмондони бригада генерали Амир Али Ҳожизода иштирок этди, деб хабар беради Эроннинг ИРНА ахборот агентлиги.
Амир Али Ҳожизода таъкидлаганидек, “Фаттоҳ” ракетаси 1400 километр масофага ва 13-15 мах тезликда уча олади, бу 15925–18375 км/соатга тенг.
Унинг сўзларига кўра, ракета юқори аниқлик ва яхши маневр қобилияти билан ажралиб туради, шунингдек, душманнинг ракетага қарши мудофаасини енгиб ўтишга, Ер атмосферасида ва ундан ташқарида маневр қилишга қодир.
Ҳожизоданинг қайд этишича, гипертовушли ракеталарни ишлаб чиқариш технологиясини Эрондан ташқари фақат АҚШ, Хитой ва Россия ўзлаштиришга муваффақ бўлган.
2022 йил ноябр ойида Эрон Аэрокосмик кучлари қўмондони биринчи марта гипертовушли баллистик ракета яратилишини эълон қилганди. Ўтган ҳафта у ракета синовлари муваффақиятли якунланганини билдирди.
