Туркия президенти Ражаб Тоййиб Эрдоған кеча 6 февраль куни мамлакатда юз берган икки зилзила оқибатида етказилган зарар 104 миллиард долларга баҳоланганини айтди.

Эрдоған, Брюсселда видеоалоқа орқали ўтказилган халқаро донорлар конференциясида сўзлаган нутқида: «Иқтисодий аҳволидан қатъи назар, ҳеч бир давлат бу катталикдаги фалокатни ўзи ҳал қила олмайди» деди. Туркия жануби-шарқида ва Суриянинг урушлар давом этаётган қисмларида ҳалокатли зилзилалар 56 мингдан ортиқ одамнинг ҳаётига зомин бўлди. Яна минглаб одамлар жароҳатланган.

Ҳукуматининг бир йил ичида табиий офатлар туфайли кўчирилганларнинг ҳаммасини жойлаштириш учун уйлар қуриши кераклигини айтган Эрдоған, 11 вилоятда 298 минг уйнинг зарар кўрганига диққат қаратди. “Биз ҳеч қачон дўстларимиз, ЕИ, БМТ ва бошқа халқаро ташкилотлар кўрсатган ёрдамни унутмаймиз”, деб қўшимча қилди у.

Европа Комиссияси президенти Урсула фон дер Ляйен: «Омон қолганларнинг эҳтиёжлари жуда катталигича қолмоқда ва зудлик билан ҳал қилиниши керак», деган. У Туркия ва Сурияга инсонпарварлик ёрдами учун 108 миллион евро (113,8 миллион доллар) ажратишга ваъда берди.

OXFAM’нинг Сурия бўйича директори Муътаз Адҳам янги мажбуриятлар “фалокат юз берганда очлик, инфляция ва қашшоқлик билан курашаётган кўплаб сурияликлар учун ҳаёт йўли бўлиши мумкин. Бироқ бизга инсонпарварлик  ёрдамидан ташқари узоқ вақтга мўлжалланган ечим керак”, деган.