Ўзбекистонда ҳаж мавсуми 2023 йил 4 июндан бошланади. Бу ҳақда Вазирлар Маҳкамаси ҳузуридаги Дин ишлари бўйича қўмита расмий телеграм каналида хабар берилди.

Бугун эрталаб эълон қилинган хабарда айтилишича, “мамлакатимиздан Саудия Арабистонига шу йил 2023 йил 4 июндан 19 июнга қадар ҳар куни 4 та авиақатнов амалга оширилади. 

Ўтган йилларда зиёратчиларимиз Республикамизнинг 7 та ҳудудий аэропортларидан кузатилган бўлса, бу йил янада қулайлик яратиш мақсадида, ўлкамизнинг 10 та ҳудудий аэропортларидан – Тошкент-Мадина, Бухоро-Мадина, Наманган-Мадина, Фарғона-Мадина, Самарқанд-Мадина, Қарши-Мадина, Термиз-Мадина Урганч-Мадина, Нукус-Мадина ва Навоий-Мадина йўналишлари бўйича зиёратчилар ҳаж сафарига кузатилади”.

Диний қўмитага кўра, «Ҳаж-2023» мавсумига тайёргарлик ишларини амалга ошириш мақсадида дастлабки ишчи гуруҳ Саудия Арабистонига жўнаб кетган ва айни пайтда улар томонидан барча ташкилий ва амалий саъй-ҳаракатлар олиб бормоқда.

Шу йил бошида Диний қўмита томонидан берилган маълумотда 2022 йили 12 045 нафар юртдошимиз Ҳаж амалларини, 61 мингдан ортиқ зиёратчи эса Умра амалларини адо этгани айтилганди.

Юқоридаги хабарда бу йилги Ҳаж сафарига қанча киши бориши очиқланмаган.