Кеча, 11 октябрь куни Фарғона вилояти Бувайда туманида 60 нафар талаба Қуръони карим ва тажвид ўрганишни бошлашди. Шу муносабат билан вилоят бош имом-хатиби Убайдуллоҳ домла Абдуллаев, Алишер домла Наимов ва Аҳмадхон домла Низомовлар таълим даргоҳига ташриф буюриб, талабалар билан суҳбатлашдилар ҳамда у ердаги шарт-шароитлар билан танишдилар.

«Ҳозиргача Фарғона вилоятида Фиқҳ мактаби қошида “Қуръони карим ва тажвид” курси фаолият олиб бораётган бўлиб, унда 60 нафар талаба таҳсил олаётган эди. Эндиликда ушбу кўрсаткич икки баробарга ошди. Бу ҳам бўлса, Аллоҳ таолонинг инъоми, қолаверса, юртимизда диний-маърифий соҳада амалга оширилаётган ислоҳотлар самарасидир», – дейилади Мусулмонлар идораси Фарғона вилояти вакиллигининг хабарида.

Яқин кунларда ушбу таълим даргоҳининг устозлар иштирокида расмий очилиши режалаштирилган.