Дунёда геосиёсий рақобат кучайди, ядровий қарама-қаршилик хавфи олдинги ўн йилликларга қараганда анча реал бўлди. 

Бу ҳақда БМТ бош котиби Антониу Гутерриш БМТнинг Нью-Йоркдаги штаб-квартирасида сўзлаган нутқида маълум қилди, дея хабар беради ташкилот матбуот хизмати.

Иқлим ҳалокати, ҳавонинг ифлосланиши ва биологик хилма-хилликнинг йўқолиши ҳамда CОВИД-19 пандемиясининг таъсиридан иборат уч карра сайёравий инқироздан ташқари, дунё тобора кўпайиб бораётган қуролли можароларга дуч келмоқда, деди Гутерриш. 

“Украинадаги ҳалокатли уруш бутун дунёда озиқ-овқат ва энергия нархининг кескин ошишига олиб келди. Истанбулдаги музокаралар натижасида озиқ-овқат ва ўғит нархи аста-секин тушиб, урушгача бўлган даражага яқинлашмоқда. Аммо шунга қарамай, пандемиядан қутулиш учун сармоя киритиш учун ресурсларга эга бўлмаган ривожланаётган мамлакатлар муқаррар равишда тубсизлик четига яқинлашмоқда”, деди ташкилот раҳбари. 

Тўрт давлат аллақачон ўз қарзларини тўламаган, дея эслатди БМТ раҳбари, бошқа кўплаб давлатлар дефолт ёқасида. Барқарор ривожланиш учун маблағлар қуриб кетмоқда ёки бошқа мақсадларга йўналтирилмоқда. 

“Дунё глобал инқирозларни бошидан кечирмоқда - CОВИД-19 пандемиясидан тортиб Украинадаги урушгача. Дунёда кенг кўламли инқироз юзага келган тақдирда манфаатдор томонларни бирлаштира оладиган ягона ташкилот йўқ. БМТ бу вазифани бажаришга қодир ягона ташкилотдир”, - деди Бош котиб. 

Ҳар бир нофаол кутиш куни дунёни глобал фалокатга яқинлаштиради, деди Антониу Гутерриш.