Қуръони карим нусхасини ёқиш каби провокациялар жамиятнинг турли қатламлари ўртасида қабул қилиб бўлмайдиган бўшлиқни яратишга қаратилган. Бу ҳақда Бирлашган Миллатлар Ташкилотининг Инсон ҳуқуқлари бўйича олий комиссари Волкер Турк маълум қилди.

БМТ Олий комиссари Онадўли агентлиги мухбири билан суҳбатда Европа мамлакатларида мусулмонларга қарши кайфият кучайиб бораётганини эътироф этди.

“Биз Европанинг кўп жойларида ва ҳаётнинг кўплаб соҳаларида мусулмонларга қарши диний камситишларга гувоҳ бўлдик. Исломофобик қарашлар ва ҳар қандай диний камситишлар бутун жамият учун заҳардир. Сиёсий ва маънавият етакчилари муросасизликка қарши кескин чиқишда ва провокацияга жавобан зўравонликка тоқат қилиб бўлмаслигини очиқ айтишда муҳим рол ўйнайди”, деди Турк.

Шу билан бирга, БМТ Олий комиссари ишга қабул қилишда мусулмонларга нисбатан нохолис муносабат борлигини ҳам қайд этди.

“Мусулмонлар бир хил малакага эга номзодларга қараганда камроқ ишга таклиф оладилар. Муслима аёлларга, айниқса ҳижобли бўлса, нафратга йўғрилган муносабат гендер  тенгсизлик ва адолатсизликдан дарак беради”, деди у. 

БМТ Олий комиссари ирқчилик ва ҳар қандай камситиш жамият асосларини бузаётганини таъкидлади.