2 июн куни Белгород вилоятининг ўққа тутилиши натижасида икки аёл ҳалок бўлди, икки эркак оғир аҳволда касалхонага ётқизилди. Вилоят губернатори ҳужумда Украинани айблади.

Россиянинг Белгород вилояти раҳбари Вячеслав Гладков Украинани минтақадаги аҳоли пунктларини ўққа тутганликда айбламоқда.

Унинг сўзларига кўра, Шебекино шаҳар тумани Маслова Пристан қишлоғидаги йўлни ўққа тутиш чоғида икки аёл ҳалок бўлган, икки эркак снаряд парчаларидан  жароҳатланган ва оғир аҳволда касалхонага ётқизилган.

Губернаторнинг сўзларига кўра, Шебекинонинг ўзида иккита кўп қаватли уйдаги хонадонлар ўққа тутилганидан кейин ёниб кетган.

Россия телевидениеси Белгород вилоятидан Пензага кўп сонли эвакуация қилинганлар етиб келганини хабар қилмоқда. Маҳаллий телеканалнинг хабар беришича, минтақага 200 га яқин аёллар ва болалар келган.

2,5 мингдан ортиқ одам Белгород вилоятининг ўзида вақтинчалик жойлаштириш марказларида қолмоқда.

Губернаторнинг сўзларига кўра, 3 июн куни яна камида 600 киши Калуга ва Ярославлга олиб кетилади.

Украина Россия ҳудудини ўққа тутганлик айбловларини инкор этиб, рейдлар Россия Федерацияси фуқаролари жанг қилаётган “Россия кўнгиллилар корпуси” ва "Россия озодлиги" легиони томонидан амалга оширилаётганини айтмоқда.