Беларус Мусулмонлари диний бирлашмаси Муфтийи ўринбораси Максат Овезовнинг маълум қилишича, Қуръони карим маъноларининг бу нашри бошқа таржималардан катта фарқ қилади. Унда жумладан, Қуръоннинг рус тилидаги дастлабки таржималаридаги каби қўпол хатоларга йўл қўйилмаган. Аҳли суннат вал жамоат ақидаси асосида тайёрланган бу маънолар таржимасини ёзишда Имом Мотирудийнинг “Таъвилоти аҳли сунна”, Имом Ибн Касирнинг “Тафсири Ибн Касир” Имом Абул Баракот Насафийнинг “Мадорикут танзил”, Фахруддин Розийнинг “Мафотиҳул ғайб”, Имом Замахшарийнинг “Кашшоф”, Имом Жалолиддин Суютийнинг “Дуррул мансур” каби мўътабар тафсирларидан фойдаланилган. Бу нашрда фақатгина Қуръони каримнинг маънолари таржимасини бериш билан чекланилмаган, балки оятларнинг мухтасар тафсири ҳам илова қилинган.

Татаристон муфтияти матбуот хизматининг хабарига кўра, Қуръони карим маъноларининг ушбу таржимаси Татаристон ва Доғистон муфтиятлари томонидан 2019 йилда тайёрланган бўлиб, унинг электрон нусхаси Беларус Мусулмонлари диний бирлашмасига Беларусда чоп этилиши учун Татаристон муфтийси Комил ҳазрат Самигуллиннинг Минскка иш сафари чоғида ҳадя қилинган.