Ўзбекистон Республикаси Қонунчилик маълумотлари миллий базаси бўлган Lex.uz сайтида 2022 йил учун Ўзбекистон Республикасининг Давлат бюджети тўғрисидаги Қонун матни эълон қилинди.

Амалда бўлган тартибга кўра, автосалондан янги машина сотиб олинса, шартнома нархининг 3 фоизи миқдорида йиғим тўланар эди. Иккиламчи бозордан машина сотиб олинганида эса транспорт воситасининг ишлаб чиқилган йилига қараб ҳар бир от кучи учун 29 минг 700 сўмгача йиғим олинарди. Энди юқоридаги қонунга асосан, ушбу йиғимлар 1 январдан тўлиқ бекор қилинди.

Иккиламчи бозордан машина сотиб оладиган кўпчилик юртдошларимиз транспорт воситасини ўз номларига расмийлаштиришда кўпроқ маблағ кетиши сабабли ишончнома (доверенность) асосида автомобилни бошқарар эди. Энди ана шу ҳамюртларимиз ҳам автомобилларини ўз номларига расмийлаштиришлари мумкин бўлади.

Шунингдек, ҳозир нотариусда тўланадиган давлат божининг юқори ставкалари ўз кучида турибди, аммо тез орада давлат божлари ҳам камайтирилиши кутилмоқда. Янада аниқроқ айтганда машинанинг от кучи ва ишлаб чиқарилган йилидан қатъи назар базавий ставканинг 3 баробари (810 минг сўм) этиб белгиланиши режалаштирилмоқда. Қуйидаги расмда эса давлат божининг амалдаги ставкалари келтирилган.