Адлия вазирлиги муносабат билдиришга ҳаракат қилибди, аммо саволлар очиқ қолган.
Жумладан,
1. Вазирликнинг жавобида шундай дейилади: «Норматив-ҳуқуқий ҳужжатлар тўғрисида”ги қонунда ишлаб чиқувчи томонидан норматив-ҳуқуқий ҳужжатларнинг лойиҳалари regulation.gov.uz порталида жамоатчилик муҳокамасини ўтказиш учун ҚОНУНЧИЛИКДА БЕЛГИЛАНГАН ТАРТИБДА жойлаштирилиши назарда тутилган. Яъни, мазкур ҚОНУНда барча норматив-ҳуқуқий ҳужжатлар лойиҳалари жамоатчилик муҳокамасига жойлаштирилиши шартлиги ҳақида ТАЛАБ МАВЖУД ЭМАС» – яъни айнан қонунда бундай талаб йўқ дейилмоқчи, аммо ўша қонунда «лойиҳалар қонунчиликда белгиланган тартибда порталда жойлаштирилиши назарда тутилган»лиги ва Президентнинг ПҚ-3666-сон қарори билан 2018 йил 1 майдан бошлаб «барча норматив-ҳуқуқий ҳужжатлар лойиҳалари лойиҳани ишлаб чиқувчи ташкилотлар томонидан Ўзбекистон Республикаси Ягона интерактив давлат хизматлари порталига жамоатчилик муҳокамаси ўтказилиши учун жойлаштирилиши лозим»лиги белгилаб қўйилганлигини ҳисобга олинмаган. Ёки Президент фармони «қонунчиликда белгиланган тартиб»га кирмайдими?
2. «Лойиҳаларнинг жамоатчилик муҳокамасига манзилли ёндашув хорижий давлатларнинг тажрибасида ҳам қўлланиб келаётган амалиёт ҳисобланади. Таъкидлаш лозимки, Беларусь ва Россия Федерацияси қонунчилигида жамоатчилик муҳокамасига жойлаштирилиши лозим бўлган норматив-ҳуқуқий ҳужжатлар лойиҳалари рўйхати белгилаб берилган» – бу ерда ЭНГ ДЕМОКРАТИК ДАВЛАТЛАР танлаб олинганми? Балки, у давлатларда аҳолининг қонун ижодкорлигидаги иштироки ёқмагандир? Нега қонун ижодкорлигида ҳар сафар ҳар хил давлатларнинг тажрибасига ёндашилади?
3. «Норма ижодкорлиги нуқтаи назаридан пишиқ бўлмаган лойиҳаларнинг порталга жойланиши кенг жамоатчиликда норозилик ва резонансларни келтириб чиқариши мумкин» – лойиҳаларни пишитиб, кейин муҳокамага қўйишга нима халақит қилаётган эди? Ёки ҳозир шу ишни қилишга, яъни муҳокамага қўйишни бекор қилишнинг ўрнига, тегишлича пишитиб сўнг порталга жойлаш тизимини жорий этишга қандай монелик бор?
4. Сўнгги масала, барча норматив-ҳуқуқий ҳужжатлар лойиҳалари жамоатчилик муҳокамаси ўтказилиши учун regulation.gov.uz порталига мажбурий жойлаштириш тартиби бекор қилинган «Фуқароларнинг ҳуқуқ ва эркинликларини таъминлаш ҳамда ҳуқуқий хизмат кўрсатишда адлия органлари ва муассасалари фаолияти самарадорлигини янада ошириш чора-тадбирлари тўғрисида»ги Президент фармони ўша вақтдаги мавжуд қонунчилик талабларига кўра, regulation.gov.uz порталига жойланиши керак эди, аммо Адлия вазирлиги буни ҳам эътиборсиз қолдиряпти.
Дарвоқе, Адлия вазирлиги 2021 йил август ойидан бери МУҲОКАМАГА БИРОРТА ҲАМ ҲУЖЖАТ ҚЎЙМАГАН ва сўнгги қарор Адлия вазирлигига тегишли экани ва катта эҳтимол билан ҳужжат яратувчиси ҳам ўзи эканлиги ортидан Адлия вазирлиги ҳужжат лойиҳаларининг ХАЛҚ МУҲОКАМАСИДАН МАНФААТДОР ЭМАС деган ўй келяпти.
Таҳририятдан: Azon.uz ушбу масала юзасидан Адлия вазирлигига журналист сўрови юборди. Жавоби эълон қилинади.
