Кеча, 20 декабрь куни Тошкент ёшлар форуми доирасида адлия вазири Русланбек Давлетов ёшлар билан учрашди. Мазкур мулоқот чоғида вазир тотализаторларни блоклаш ҳақидаги саволга жавоб берган.

У бугунги кунда тотализаторлар тарбияга жуда қаттиқ таъсир қилаётганини таъкидлаб, уни техник томондан чегаралашнинг имкони бўлиши кераклигини, фақат буни соҳа мутахассислари яхшироқ билишини маълум қилган.

«Бу тўғрисида ишлаш керак, бу давлатнинг мажбурияти. Чунки аҳоли ҳар хил йўлларга кириб кетишининг олдини олиш учун ҳам тегишли давлат органлари ишлаши керак», — деган Русланбек Давлетов.

Шунингдек у ривожланган давлатларда бу соҳага психология хизматлари киритилиб, одамлар қиморга жуда берилиб кетган бўлса, уларга аноним курсларда ёрдам кўрсатилишини айтган.

Вазир ўзининг Лос-Анжелесда ўқиган пайтларини эслар экан, қиморнинг қанчалик даҳшатли нарса эканлигига гувоҳ бўлганини сўзлаб берган.

«Тақиқлаш нуқтаи назаридан ҳозир инсон сифатидаги фикрим билан Адлия вазири сифатида фикрим аралашиб кетиб қолади. Лекин аралашса ҳам айтаман, мен ҳам бунинг тарафдори эмасман. Ëшлигимда Лос-Анжелес коллежида ўқиган пайтимда бунинг нақадар даҳшатли нарса эканлигини кўрдим. Тотализатор уни ўйнаётган одамга эмас, ҳаммаёққа, атроф-муҳитга таъсир қилади. Бу индустрия, у қадриятлар бизга тўғри келмайди. Шунинг учун албатта бу борада давлат бошқаруви жуда қаттиқ бўлиши керак. Менинг фикрим шу», — дея сўзларини якунлаган адлия вазири.

МАВЗУГА ДОИР МАҚОЛАЛАР: