Ўмон Маданият ва миллий мерос вазири Ҳайсам бин Тариқ ал-Саид мамлакатнинг янги султони бўлди. Бу ҳақда давлат телевидениеси хабар тарқатди.
Ўмон Олий ҳарбий кенгаш аъзолари ҳукмрон сулола вакилларининг кўз ўнгида марҳум султон Қобус ибн Саид ал-Саиднинг васияти жойланган конвертни очди ва шу тариқа янги султоннинг исми маълум бўлди. Сулола вакиллари марҳум султоннинг танловини маъқуллади ва янги ҳукмдор уларнинг ҳузурида қасамёд қабул қилди.
66 ёшли Ҳайсам бин Тариқ ал-Саид 2002 йилдан бери Маданият ва миллий мерос вазири лавозимида ишлаб келаётган эди.
Қобус ибн Саид ал-Саид 11 январга ўтар кечаси 79 ёшида вафот этди. Унинг вафоти муносабати билан Ўмонда уч кунлик мотам эълон қилинди.
