Ўмонда коронавирусга қарши камида бир марта эмланганларнинг жума намозига боришига рухсат берилди, дея ёзади The National News нашри.

Мазкур мамлакатда жума намозлари 2020 йилнинг мартидан бери ўқилгани йўқ. Эртадан бошлаб жума намозини ўқишга рухсат берилади, бироқ масжидларнинг тўлиш даражаси эллик фоиздан ошиб кетмаслиги зарур.

Жума намозига бормоқчи бўлганлар интернет орқали ариза беришлари ва масжидга кираётганда эмланганлик ҳақидаги ҳужжатни кўрсатишларига тўғри келади. Масжидда ҳимоя ниқоби тақиш ва уйдан жойнамоз олиб келиш керак. 

Ўмонда 300 мингдан зиёд кишида коронавирус аниқланган, 4 мингдан ортиқ бемор вафот этган. Шу пайтгача аҳолининг 74 фоизи коронавирусга қарши тўлиқ эмланди.