Сурия ҳукумати назоратидаги ҳудудларда яшовчи аҳолининг қарийб ярми ўзини хавфсизликда деб ҳисобламайди. Сурия фуқароларнинг қадр-қиммати уюшмаси ўтказган сўровнома натижаси ана шундай, дея хабар беради The New Arab нашри.
Сўровномада ўз юртида ва хорижда яшайдиган беш юздан зиёд суриялик қатнашган. Уларга ҳукумат, фуқаролар урушнинг сиёсий ечими, ҳукуматнинг коронавирусга қарши кураши ва коррупция ҳақида саволлар берилган.
Ҳукумат назорат қиладиган ҳудудларда яшайдиган сурияликларнинг қарийб 50 фоизи, чет эллардагиларнинг 67 фоизи ўзини хавфсизликда эмас деб ҳисоблашини маълум қилган. Бу кўрсаткич айниқса “сулҳ тузилган” ҳудудларда юқори эканлигини апниқланди – 94 фоиз.
Бундай ҳудудлар сирасига Суриянинг 2018 йилда ҳукумат кучлари назорат ўрнатган жанубий қисми киради. Ҳукумат назоратига ўтишни осонлаштириш мақсадида бу ерларда собиқ мухолифлар билан сулҳ тузилган. Сулҳ доирасида мухолифатнинг собиқ аъзолари афв олиши мумкин. Бироқ Сурия фуқароларнинг қадр-қиммати уюшмасининг ҳисоботида айтилишича, амалиётда бундай бўлмади.
