Сурияда кимёвий қурол қўллашга алоқадор бўлганлар ҳалигача тегишли жазога тортилмаган. Ҳалок бўлганларнинг оила аъзолари ва яқинлари, шунингдек, тақиқланган қурол қўлланишидан жабрланганлар ҳамон адолат кутмоқда.
Бу ҳақда Сурия инсон ҳуқуқлари тармоғининг (SNHR) Кимёвий уруш қурбонларини хотирлаш куни муносабати билан тарқатилган ҳисоботида айтилади.
«Асад режими жорий асрда энг кўп кимёвий қурол қўллаган» деб номланган ҳужжатда Суриядаги уруш йилларида Башар Асад тарафдорлари 217 марта кимёвий қурол қўллагани, мухолифат назоратидаги ҳудудларга зарба бергани айтилади. Шунингдек, 1500 нафардан ортиқ кимёвий қурол қурбонлари аниқлангани қайд этилган.
Ҳуқуқ фаоллари 2013 йил 21 август куни Дамашқ яқинидаги Шарқий Гутада содир бўлган қирғиндан кейин ҳам Асад режимининг кимёвий қурол ишлатишдан воз кечмаганига эътибор қаратган. Ҳужумда юзлаб суриялик ҳалок бўлган эди.
Ўша даҳшатли кундан кейин ҳам Асад режими тарафдорлари Сурия аҳолисига қарши 184 марта тақиқланган қуроллардан фойдаланган, дейилади ҳисоботда.
