Қирғизистон президенти Садир Жапаров Украина шарқидаги вазиятни одамлар қурбон бўлишига йўл қўймаслик учун музокаралар столида, фақат тинч дипломатик йўл билан ҳал этиш тарафдори эканини айтди.

“Украина шарқидаги вазиятнинг ривожланишини хавотир ва чуқур ташвиш билан кузатяпман. Менга жумладан Донбасс атрофидаги вазиятнинг ривожланиши ҳақида мунтазам маълумот беришяпти. Қирғизистон Республикаси доимо БМТ Хавфсизлик Кенгаши томонидан қўллаб-қувватланган ва можарони ҳал қилиш бўйича ягона ҳужжат бўлган Минск келишувларига риоя қилиш заруратидан келиб чиққан. Афсуски, унинг талабларининг бажарилмагани ҳозирги қийин вазиятга олиб келди”, – деб ёзди Жапаров Фейсбукдаги саҳифасида.

У “можаронинг янада кучайишига йўл қўймаслик учун максимал даражада эҳтиёткор ва вазмин бўлиш”га чақирди.

“Мен у ёки бу давлатни тан олиш ҳар қандай давлатнинг суверен ҳуқуқи эканлигини таъкидламоқчиман”, – дея хулоса қилди Қирғизистон президенти. Унинг фикрича, бу кўплаб Россия фуқаролари яшайдиган Донбассда тинч аҳолини ҳимоя қилиш учун мажбурий чора бўлган бўлган бўлиши мумкин. 

Жапаров «мажбурий чора» деганда айнан нимани назарда тутганини айтмаган бўлса-да, Россия президенти Владимир Путиннинг Донецк ва Луганск халқ республикалари  мустақиллигини тан олиш ҳақидаги қарорига ишора қилган бўлиши мумкин.