«Истеъмолчиларнинг ҳуқуқларини ҳимоя қилиш тўғрисида»ги Ўзбекистон Республикаси Қонунига қўшимча ва ўзгартиришлар киритиш ҳақида»ги Қонун қабул қилинди. Унга кўра, ишлаб чиқарувчи(ижрочи, сотувчи) ҳақидаги, савдо ва хизмат кўрсатиш қоидалари тўғрисидаги маълумот истеъмолчига давлат тилида тақдим этилади.
Шунингдек, товарлар (ишлар, хизматлар) учун нақд пулсиз шаклда ҳақ тўланганда, истеъмолчиларга рағбатлантиришлар берилиши мумкин. Бундан ташқари шартномага истеъмолчиларнинг қонунчиликда назарда тутилган ҳуқуқларини камситадиган шартларни киритиш, шунингдек уларга қонунчиликда белгиланган имтиёзлар ва афзалликларни бермаслик таъқиқланади.
«Янги қоидаларни амалда қўллашдаги асосий муаммо бу истеъмолчи ҳуқуқларини тан олмайдиган монопол корхона ва ташкилотларимиз томонидан унга амал қилинмаслиги бўлиши мумкин. Бироқ кичик корхоналар билан масала йўқ, улар қонунлардан қўрқади ва ҳурмат қилади», – деган мазкур қонуннинг қабул қилинишига муносабат билдирган Олий Мажлис Қонунчилик палатаси депутати Расул Кушербаев.
Қонунда яна бир қатор қўшимчалар киритилган бўлиб, улар тўлиқ истеъмолчи манфаатлари учун хизмат қилиши белгиланган.
