Исроилнинг АҚШ президенти Дональд Трампнинг “тинчлик режаси”га мувофиқ Иордан дарёсининг ғарбий соҳлини аннексия қилиши Оқ уйга боғлиқ. АҚШ Исроилнинг ушбу қадамини қўллаб-қувватлаши зарур. 

Kan радиоси хабарига кўра, Исроил бош вазири Биньямин Нетаньяҳу душанба куни ана шундай баёнот билан чиққан. “Суверенитет масаласи Вашингтонда, Оқ уй буни қўллаб-қувватлаши зарур. Бу масала кун тартибидан олиб ташланмаган”, – деди Нетаньҳу ўзи бошчилик қиладиган “Ликуд” партиясининг йиғилишида.  

Исроил ҳукумати жорий йилнинг 1 июлида Ғарбий соҳил ҳудудининг бир қисмини аннексия қилиш бўйича ҳаракатларни бошлашни режалаштирган эди. Бу Фаластиннинг қаттиқ норозилигига, халақаро ҳамжамиятнинг эътирозига сабаб бўлди. Бош вазир Нетаньяҳу аннексияни кечиктирмоқчи эмаслигини айтган бўлса-да, 1 июль куни ҳеч қандай ўзгариш содир бўлмади.  

Жорий йил январида Трамп ва Нетаньяҳу Исроил – Фаластин муаммосини ҳал қилишга қаратилган режани эълон қилди. Унда АҚШнинг босиб олинган Фаластин ерларини Исроил ҳудуди деб тан олиши кўзда тутилган эди.