Ислом академиясида 28 сентябрь, сешанба куни «Марказ фондида сақланаётган 100 та нодир китоб» мавзусида китоблар тақдимоти бўлиб ўтди. Бу ҳақда Ўзбекистон халқаро ислом академияси матбуот хизмати хабар берди.

Тақдимот Ислом цивилизацияси маркази, Ўзбекистон Халқаро Ислом академияси ҳамда Ўзбекистон Республикаси Ёшлар ишлари агентлиги ҳамкорлигида ташкил этилган бўлиб, унда талабаларни касбга йўналтириш бўйича манбашунослик ва муқовасозликдан маҳорат дарси ва маърифий танловлар тадбири бўлиб ўтган.

Маълум қилинишича, марказ ноёб қадимий ва замонавий китоблар, каталог ва манбалардан шаклланган жами 4193 номдаги 4923 дона китобдан иборат «Араб ва ислом олами» ҳамда «Шарқ ва Ғарб» деб аталувчи икки йирик коллекцияга эгалик қилади. Ушбу ноёб коллекция жаҳонда ягона ҳисобланади.

Ислом цивилизацияси маркази директори ўринбосари Фирдавс Ҳалимовнинг айтишича, кутубхона фондида 15 мингтадан ортиқ ноёб илмий ва бадиий китоблар, 1000 га яқин қўлёзма ва тошбосма асарлар, 500 мингга яқин илмий қўлёзмалар, тошбосма китоблар ва санъат асарларининг электрон нусхаси бўлиб, уларнинг каталоглари, ўтмишимизга оид тарихий ҳужжатларнинг архиви яратилмоқда.

Марказ директори ўринбосари Шайх Абдулазиз Мансурнинг сўзларига кўра, илмий ходимлар томонидан ноёб асарлар турли тилларга таржима қилиниб, янгидан чоп этилмоқда. Хусусан, буюк саркарда Амир Темурдан мерос қолган «Темур тузуклари» беш тилда, яъни ўзбек, форс, рус, инглиз ва француз тилларида бир жилд шаклида жамланиб, нашр қилинган.

Таъкидланишича, Ислом цивилизацияси маркази томонидан Ўзбекистонда Марказий Осиё мусулмон мутафаккирларининг жаҳон цивилизацияси ривожидаги ролига бағишланган 10 дан ортиқ китоб ва рисола тайёрланган.
Шунингдек, тадбир доирасида хаттотлик ва муқовасозлик бўйича талабаларга маҳорат дарслари ҳам ташкил этилган.