Олийлик ва карам эгаси Аллоҳнинг махлуқотларидаги гўзалликларга боқиш ва борлиқдаги ажойиботларга ибрат ила лаззатланиш қалб қувончи сабабларидан бўлиб, у очиқ-равшан китобдир. Аллоҳ таоло махлуқотлари борасида бундай марҳамат қилган:

“...У (сув) билан гўзал боғларни ўстирдик” (Намл сураси 60-оят);

“Булар Аллоҳ яратган нарсалардир. Энди, (эй мушриклар!) сизлар менга Ундан ўзгалар нималарни яратганини кўрсатингиз-чи!” (Луқмон сураси, 11-оят);

“Айтинг: “Осмонлар ва Ердаги нарсаларга (ибрат назари билан) боқингиз!” (Юнус сураси 101-оят).

“Раббимиз ҳар бир нарсага ўз яратувчилигини ато этиб (кўрсатиб), сўнгра (уни) тўғри йўлга йўллаган зотдир” (Тоҳа сураси 50-оят).

 Байт:

Фазо китобига гар солсам назар,

Менда йўқ суратлар унда кўринар.

Чарақлаган қуёшда, ёрқин юлдузларда, тонгда,  аъзоларда, тепаликда, дарахтда, мевада, зиёда, ҳавода, сувда ва борлиқнинг бошқа нарсаларида ўқиладиган нарсалар бор.

Байт:

Ҳар бир мавжудотда бир белги аён,

Аллоҳ бирлигидан беради нишон.

 Илё Абу Мозий айтади:

Эй шикоят қилғучи, сенда не ун,

 Гар жисмда оғриқ ила ўтса тун?

 Гулга боқсанг, кўринур ёлғиз тикан,

 Ложувард шабнамни кўрмассан ҳечам.

 Гўзаллик қалбингдан олган бўлса жой,

 Қай сорига боқсанг, кўринур чирой.