Ироқ миллий хавфсизлик маслаҳатчиси Қосим Аражи Миллий разведка мувофиқлаштириш кенгаши йиғилишида пойтахт Бағдоддаги Имоми Аъзам мақбараси бузилмаслигини маълум қилди. Бу ҳақда “Анадолу” агентлиги хабар бермоқда.

“Ижтимоий тинчликни нишонга олган (Имоми Аъзам Абу Ҳанифа мақбарасини бузиш ҳақидаги) чақириқларни рад этамиз. Хавфсизлик кучларимиз бундай чақириқларга қатъий қарши чиқади”, – деди Аражи.

Унинг айтишича, Ироқ шиаларининг раҳнамоси Али Систони ва бошқа етакчилар мамлакатда тинчлик-тотувликка зарба берувчи бундай чақириқларга қарши чиқмоқда.

Бағдодда ораларида радикал шиалар ҳам бўлган айрим гуруҳлар ижтимоий тармоқлар орқали Имоми Аъзам мақбарасини бузишга чақирмоқда. Мақбара пойтахтнинг Аъзамия мавзесида жойлашган. Бундай чақириқлардан кейин мақбара атрофида хавфсизлик чоралари кучайтирилган.