АҚШ президенти Жо Байден америкалик жисмоний ва юридик шахсларнинг инвестиция киритиши тақиқланган Хитой компаниялари рўйхатини кенгайтириш ҳақидаги фармонни имзолади. Бу ҳақда Оқ уй матбуот хизмати маълум қилди.

Рўйхатга 59 та компания киритилди, Вашингтоннинг фикрига кўра, улар Хитой ҳарбий-саноат комплексига алоқадор. Фармонга биноан америкаликларнинг ушбу компанияларга тегишли ҳар қандай қимматли қоғозларни сотиб олиши ва сотиши тақиқланади. Ушбу тақиқ жорий йилнинг 2 августидан кучга киради.

АҚШнинг “қора рўйхати”га тушганлар орасида Хитой давлат ҳарбий-саноат компанияси (CASIC), Хитой аэрокосмик илмий-техник корпорацияси (CASC), China Mobile, Хитой миллий ядро корпорацияси (CNNC), Хитой миллий шельф нефт компанияси (CNOOC), Хитой темир йўл қурилиши компанияси (CRCC), ярим ўтказгичлар ишлаб чиқарадиган SMIC компанияси, телекоммуникация соҳасида дунёнинг етакчи компанияларидан ҳисобланган Huawei бор.

Мазкур тақиқ рўйхатга киритилган компаниялар қимматли қоғозлари билан амалга ошириладиган молиявий операциялар туфайли келиб чиқадиган таҳдид муносабати билан АҚШ миллий хавфсизлигини таъминлаш учун қўшимча чоралар сифатида изоҳланди.