БМТ Хавфсизлик Кенгашининг Қуддус бўйича тайёрланган резолюциясига АҚШ вето қўйди. Ҳужжат муаллифлари АҚШ президенти Дональд Трампнинг исмини зикр этмаган ҳолда унинг Қуддус шаҳрини Исроилнинг пойтахти деб тан олиш ҳақидаги қарорини қоралаган. 

Резолюция лойиҳасини Хавфсизлик Кенгашига аъзо қолган 14 давлат қўллаб-қувватлади. Ҳужжатда Қуддуснинг мақоми ва демографик таркибини ўзгартиришга қаратилган ҳар қандай хатти-ҳаракат ҳуқуқий кучга эга эмаслиги ва бекор қилиниши кераклиги айтилган. Шунингдек, лойиҳа муаллифлари давлатларни Қуддусда дипломатик ваколатхона очмасликка чақирди. 

АҚШнинг БМТдаги доимий вакили Никки Хейли элчихонани қаерда очиш давлатларнинг суверен ҳуқуқи эканини айтди. 

“Биз АҚШнинг суверенитети ва унинг Яқин Шарқ тинчлик музокараларидаги ролини ҳимоя қилиш учун вето ҳуқуқимиздан фойдаландик, – деди у. – Шундай экан, бунинг учун уялмаймиз. Аксинча, Хавфсизлик Кенгашининг қолган аъзолари уялиши керак”. 

Никки Хейли президент Трампнинг Қуддус борасидаги қарори Хавфсизлик Кенгашининг аввалги резолюцияларига зид эмаслигини, танқидчилар эса уни ўз манфаатлари йўлида нотўғри талқин қилаётганини таъкидлади. 

Унинг айтишича, “БМТ Яқин Шарқдаги энг мустаҳкам демократияга нисбатан душмаларча муносабатда бўлувчи марказга айланган”.