Табиблар "Бу вирус ўпкани эгаллаб, инсоннинг тезда вафот этишига сабаб бўлади" дейишяпти.
Сиёсатшунослар "Бу вирус баъзи давлатларни иқтисодий таназзулга тушириш учун тарқатилмоқда" дейишяпти.
Қора шляпаликлар "Бу махфий биологик уруш бўлиб, мамлакатларни бўйсундириш учун қилиняпти" деяптилар.
Бўйнига хоч осиб, устига махсус либос кийиб юрадиганлар "Бу оламнинг ниҳояси, тугаши" дейишяпти.
Энди мен айтаманки, бу вабо Аллоҳ таолонинг аскарларидан бўлиб, Аллоҳ уни бизга ҳужжатни қоим қилиш учун юборган.
Ислом дини эркак-аёлнинг аралашиб юришидан қайтарган бўлса-да, кўришганда қучоқлашиб, оғиз-бурун ўпишиб кўришадиганлар бор эди. Бугун улар саломатликни асраш учун бир неча метр узоқдан кўришяптилар.
Динимиз ҳижобга буюрганини билса-да, ҳижобнинг устидан кулиб, уни жоҳиллик, қолоқлик сарқити деб кариллайдиганлар бугун совуқдаги пингвиндек қалтираб, кўчага ниқоб ва қўлқопда чиқяптилар.
Намозимиз бизга фарз эканини билсалар-да, "манави ерим тоза" дея қалблари тозалигини ва "танам ҳам тоза" деб, таҳорат қилишга ҳожати йўқлигини даъво қиладиганлар бугун юз-қўлларини совунлаб шу даражада ювяптиларки, ҳатто суяклари синиб кетай дейди.
Аллоҳ таолони кўрмагани учун иймон келтирмай юрган даҳрийлар бугун уй ва кўчаларда кўзлари кўрмаётган вируснинг юқишидан қўрқиб юрибдилар.
Жуда кўп инсонларнинг виждонлари тозаланиши учун, ўз ўрниларини билишлари, дунёда нега яшаётганларини англашлари учун фурсатдир бу кунлар.
Шу кунларда ҳатто Каъбаи Муаззамага ҳам қўлларимиз теголмай турибди.
Виждонларимиз тоза бўлиб, гуноҳларимизга қаттиқ тавба қилиб, афсус-надомат чекиб, Аллоҳ таолонинг ҳузурида синиқлик, хорлик ҳолида туришимиз учун фурсатдир бу кунлар.
Сабабларни қилайлик-да, Аллоҳ таолонинг Ўзига таваккул қилайлик! Шифони Ўзидан сўрайлик!
Аллоҳ таоло қайси дардни туширган бўлса, албатта, давосини ҳам туширган.
Шифо берувчи фақат Ўзидир!
Аллоҳ таолога кўп истиғфор айтиб, тавба қилайлик!
У Зотга кўп тасбеҳ айтайлик!
Пайғамбаримиз соллаллоҳу алайҳи васалламга саловот ва саломни кўпайтирайлик!
Тонгги ва кечки дуоларни мунтазам айтиб юрайлик!
Аллоҳ таоло юртимизни, халқимизни турли касаллик ва ваболардан асраб, Ўзининг ҳидоятидан айирмасин ва хотимамизни чиройли қилсин!
Нозимжон Ҳошимжон тайёрлади
