Татаристон ҳукумати L-410 самолёти ҳалокатга учраши муносабати билан 11 октябрни мотам куни деб эълон қилди. Бу ҳақда республика президентининг матбуот хизмати хабар тарқатди.

Президент Рустам Миннихановнинг фармонига биноан мотам кунида кўнгилочар дастурлар ва тадбирлар бекор қилинади. Шунингдек, Вазирлар Маҳкамаси ҳодисада ҳалок бўлганлар ва жароҳат олганларнинг оилаларига ёрдам кўрсатиш бўйича таклиф тайёрлайди.

Якшанба куни Татаристоннинг Мензелинск туманида L-410 самолёти ҳавога кўтарилганидан ҳеч қанча ўтмай ҳалокатга учради. Самолёт бортида 2 учувчи ва 20 нафар парашютчи бор эди. Ҳодиса натижасида 16 киши ҳалок бўлди, 6 киши оғир жароҳатланди.

Ушбу ҳалокатдан кейин Россияда L-410 самолётларининг парвози вақтинча тўхтатиб қўйилди.