Бугун, 30 июль куни Грузияда тоғли Гудаури курортида вертолёт қулаши оқибатида ҳалок бўлганлар хотирасига мотам куни эълон қилинди, деб хабар бермоқда “Новости-Грузия”.
Грузия Ички ишлар вазирлиги чегара хизматига тегишли МИ-8 вертолёти кеча, 29 июль куни Гудаурида парапланчиларни қутқариш операцияси вақтида ҳалокатга учради.
Вертолёт Соғлиқни сақлаш вазирлиги шошилинч тиббий ёрдам маркази шифокорларини ва фавқулодда вазиятларни бошқариш хизмати қутқарувчиларини воқеа жойига етказиш учун тушдан кейин Тбилисидан ҳавога кўтарилган.
Ҳодиса Гудаурини Коби билан боғловчи магистралнинг биринчи туннели яқинида содир бўлган. Вертолёт маневр пайтида думи билан тошга тегди, бу эса орқа перванелнинг вайрон бўлишига олиб келди. Шундан сўнг у бошқарувни йўқотиб, йиқила бошлаган. Қояга навбатдаги зарба туфайли вертолёт портлаб, дарага қулаган.
Вертолётдаги саккиз кишининг барчаси ҳалок бўлган.
