Margiris кемаси Франция қирғоғига яқин жойда 100 минг ўлик балиқни тўкиб юборгани хабар қилинди. Голландияга тегишли бўлган мазкур кема дунёдаги энг катта иккинчи балиқ овлаш кемаси ҳисобланади.

Франция денгиз вазири Анник Жирарден Атлантика океани юзасида ўзига хос «сузувчи гилам»ни ҳосил қилган балиқлар бўйича тергов ишлари бошланишини қайд этган.

Балиқларнинг тўкилишига кеманинг тўридаги ёрилиш сабаб бўлгани тахмин қилинмоқда. Шунингдек, 100 мингдан ортиқ балиқнинг тўкилиши натижасида Атлантика океанининг тахминан 3 минг квадрат метр майдони ўлик балиқлар билан қопланганини таъкидланмоқда.

Margiris ва бу каби кемалар узунлиги бир километрдан ҳам зиёдроқ тўрлардан фойдаланади ва тутган балиқларини қайта ишлайди. Бу эса экологлар томонидан қаттиқ танқид қилинади.