«Толибон» ҳаракати ҳужумларни орттиргани туфайли Германия афғонистонликларни депортация қилишни тўхтатди. Deutsche Welle хабарида айтилишича, Германия Ички ишлар вазири Хорст Зеехофер ана шундай қарор қабул қилган.

«Вазият имкон бериши билан жиноятчилар ва хавф туғдирувчи шахсларни Афғонистонга депортация қилиш қайтадан бошланади», – деди Зеехофер.

Ўтган ҳафта Кобулда терактлар юз бергани учун Мюнхендан олти афғонистонликни депортация қилиш тўхтатилган эди. 

Германия Ички ишлар вазирлиги маълумотига кўра, жорий йил бошидан бери 167 афғонистонлик юртига қайтариб юборилган. Яна 30 минг нафари Германияни тарк этиши зарур, аксарининг бошпана олиш учун қилган мурожаати қаноатлантирилмаган. Афғонистонда вазият ёмонлашгани туфайли Европага қочқинлар оқими ортиши кутилмоқда.