Ўзбекистон яшаш нархи қимматлиги индекси бўйича дунёда 133-ўринни, ижара ҳақи индекси бўйича эса 139 давлат орасида 106-ўринни эгаллади.
Numbeo томонидан эълон қилинган индексда Бермуд ороллари, Швейцария ва Норвегия яшаш нархи бўйича етакчи ўринларни эгаллаган. Унга кўра, Бермуд оролларидаги ижара индекси 146,06 га, Швейцарияда 123,35 га, Норвегияда эса 100,90 га тенг. Қўшни мамлакатлардан Қозоғистон мазкур индексда 129-ўринда, Афғонистон эса 138-ўринда қайд этилган.
Қозоғистоннинг Олмаота ва Тошкент шаҳарларидаги нархларни таққослаганда, пойтахтимизда жойлашган ресторанлар ва фаст-фудлардаги таомлар 13-29 фоизга арзонроқ, Coca-cola ва Pepsi эса 22 фоизга қимматроқ.
Шунингдек, ижаралар рейтингида биринчи учликдан Бермуд ороллари, Гонконг ва Сингапур жойлашган. Энг арзон ижара жойлари эса Непаль, Покистон ва Афғонистонда жойлашган.
Маълумот учун: ушбу индекс АҚШнинг Нью-Йорк шаҳрига нисбатан ҳисобланган. Яъни қайсидир мамлакатнинг кўрсаткичи 120 бўлса, бу Нью-Йоркдан 20% кўп, агар кўрсаткич 70 га тенг бўлса, Нью-Йоркдан 30% кам эканлигини билдиради.
