Тожикистоннинг Хатлон вилояти Қубодиён туманида Ўзбекистон томонидан тиббиёт мажмуаси барпо этилди. Asia-Plus нашрининг хабар берича, бу ерда 2018 йилнинг иккинчи ярмида бошланган қурилиш ишлари ҳозирга келиб якунига етган ва мажмуа беморларни қабул қилишга тайёр.
Тожикистоннинг илтимосига кўра мажмуада коронавирусга чалинган беморларни қабул қилиш учун алоҳида тақсимлагич бунёд этилди. Бунга ўхшаш тақисмлагич Тожикистонда бошқа йўқ. Бу ерда беморда коронавирус бор-йўқлиги қисқа вақтда аниқланади ва у малакали тиббий ёрдам олиши учун марказий шифохоналарга жўнатилади.
Хабарда айтилишича, тиббиёт мажмуасини қуриш ва жиҳозлаш “Ўзбекнефтгаз” компанияси ҳисобидан амалга оширилган.
Ўтган йилнинг сентябрида Тожикистоннинг Сўғд вилояти Спитамен туманида Ўзбекистон қуриб берган 630 ўқувчига мўлжалланган мактаб фойдаланишга топширилган эди.
