Туркиянинг Ой миссиясида ишлатиладиган ракета мазкур мамлакатнинг ўзида ишлаб чиқарилди. Бу ҳақда Туркия Саноат ва технология вазири Мустафо Варанк “Анадолу” агентлигига маълум қилди.
Гибрид двигателли ушбу ракета Delta V Space Technologies Inc. компаниясида ишлаб чиқарилган бўлиб, ундан Ойга учувчисиз фазо аппаратини учиришда фойдаланилади.
Анқара Ой миссиясисини икки босқичда амалга оширмоқчи. Биринчи – 2023 йилдаги босқич халқаро компаниялар билан ҳамкорликда амалга оширилади, бунда учувчисиз фазо аппарати Ойга қўнади. Иккинчи босқични эса 2028 йилда амалга ошириш кўзда тутилмоқда, бунда ракета учиришни Туркиянинг ўзи уддаламоқчи.
Туркия президенти Ражаб Тоййиб Эрдоған 9 февраль куни миллий фазо дастурини эълон қилди. Дастурда мамлакатнинг ўз космодромини барпо этиш, Туркия фуқаросини фазога юбориш, шунингдек, янги сунъий йўлдошларни учириш каби режалар бор.
