Ижтимоий тармоқларнинг ўзбек сегментида гўёки турк олимлари хитойлик ҳамкасблари билан ҳамкорликда янги коронавирусни даволайдиган дорини ишлаб чиққани ҳақида хабарлар тарқалмоқда. 

Ушбу хабарларда тилга олинган маълумотлар деярли ҳақиқатга тўғри келмайди. Рост жойи шуки, Туркияга Хитойдан чиндан ҳам дори олиб келиниб, ўтган ҳафта қирқта шаҳарга тарқатилди.

Фавипиравир деб аталувчи бу дори муолажа муддатини 11 кундан 4 кунга тушириши айтилмоқда. Аслида бу пререпарат Японияда ишлаб чиқарилган ва бир қатор вирусларга қарши

қўлланади. Хитойлик олимлар фавипиравир янги коронавирусни даволашда ҳам яхши самара беришини аниқлашди. 

Кеча, 1 апрел куни бўлиб ўтган матбуот анжумани Туркия соғлиқни сақлаш вазири Фахриддин Кожа коронавирусга қарши янгича даволаш усулларига ҳам тўхталиб ўтди.

Жумладан, у касалликдан тузалган ва организмида антитана ҳосил бўлган кишилардан беморларга плазма ва ўзак ҳужайра кўчириб ўтказиш устида иш олиб борилаётганини айтди.