Туркия Ташқи ишлар вазирлиги Афғонистонда қизларнинг ўрта таълимда ўқишига қўйилган чекловни олиб ташлаш ва барча ёшдаги қизларнинг ўқишига рухсат беришга чақирди.
Маълумки, Афғонистондаги “Толибон” маъмурияти қизларнинг бошланғич ва ўрта мактабларда ўқишини тақиқлаб қўйди. Афғонистонда қизлар учун мактабларнинг ёпилиши танқидларга сабаб бўлмоқда. Жумладан, Туркия ҳукумати ҳам афғон хотин-қизларининг бошқа ҳақлари қатори таълим олиш ҳуқуқларидан тўлиқ фойдаланишларига етарли шарт-шароит яратиш тарафдори.
"Афғонистонда хотин-қизларнинг ўрта таълимда таълим олишига қўйилган чеклов ҳалиям давом этаётганидан афсусдамиз. Афғонистон Муваққат ҳукуматини барча ёшдаги хотин-қизларнинг таълим олишига имкон беришга чақирамиз. Биз оғир кунларда афғон халқининг ёнида эканимизни таъкидлаймиз", дейилади Туркия томонидан юборилган ёзма баёнотда.
Эслатиб ўтамиз, куни кеча Покистонда бўлиб ўтган Ислом Ҳамкорлик Ташкилоти саммитида сўзга чиққан Туркия ташқи ишлар вазири Мавлуд Чавушўғлу Туркиянинг “Маориф” фонди Афғонистонда мактаблар ташкил этгани, яқинда Кобулда қизлар учун икки янги мактаб очилишини айтгани ҳақида хабар берган эдик. https://azon.uz/content/views/turkiya-musulmonlarning-huquqlari-uchun
Дарвоқе, ҳозирча расмий Анқара Афғонистондаги “Толибон” ҳукуматини расман тан олгани йўқ.
