«Шайх Муҳаммад Содиқ Муҳаммад Юсуф» масжидида хайрли ташаббус йўлга қўйилди. Масжиднинг имом-ноиби Ҳасанхон Яҳё Абдулмажид ҳар куни оқшом хатмонада ўқиладиган сура ва оятларнинг маъно ва мазмуни, нозил бўлиши каби мавзуларда сўз юритиши баробарида айни кундаги долзарб масалаларга ҳам Қуръон оятлари билан тушунтириш бериб бормоқда. Бу билан халқимиз Қуръони карим билан янада кенгроқ танишиш имкониятига эга бўлмоқда.
Хайрли ишнинг яна бир томони, ушбу суҳбатлар ва таровеҳ намозларини mediabox.uz сайтида, IPTV платформаси 77-каналида ва islom.uz порталининг ижтимоий тармоқларида тўғридан-тўғри жонли эфирда ёритилмоқда.
Илк суҳбат Қуръон билан танишиш мавзусида бўлиб, унинг нозил бўлиши ҳамда асл моҳияти ҳақида сўз юритилди. Суҳбат давомида Қуръоннинг «Фотиҳа» ва «Бақара» сурасидан тортиб, бугунга қадар 28 суранинг мазмуни, ундаги келтирилган оятлар, воқеалар, аҳкомлар, шариат қоидалари билан танишиб жамоат, жонли кузатувчилар ҳам бир олам билимга эга бўлмоқда.
Ушбу муборак ойнинг ғанимат кунларида сиз ҳам мазкур суҳбатда иштирок этинг, Қуръонга ошно бўлиб, унинг асл мухлисига айланинг. Икки дунё саодатига етакловчи суҳбатдан бебаҳра қолманг!