2018 йилнинг 5 январида бўлиб ўтган Тошкент вилояти халқ депутатлари кенгашининг навбатдан ташқари сессиясида Президентимиз вилоятдаги таъмирга муҳтож ва авария ҳолатидаги масжидларни аниқлаб, уларни қайта қуриш ва таъмирлаш чораларини кўриш юзасидан кўрсатма берганди. Шунга кўра, 2018 йил 15 февралда Ўзбекистон Республикаси Вазирлар Маҳкамасининг “Муқаддас қадамжолар, зиёратгоҳлар, масжидлар ва қабристонларни ободонлаштириш ишларини самарали ташкил этиш тўғрисида”ги 120-сонли қарори қабул қилиниб, вилоятда жами 29 та жоме масжидларни 2018-2019 йиллар давомида қайта қурилиши белгилаб олинганди.

Ана шу дастурга мувофиқ, куни кеча Бўстонлиқ туманидаги “Мулла Пўлат ота” жомеъ масжидининг пойдеворига дастлабки ғишт қўйилди. Эндиликда “Мулла Пўлат ота” жоме масжиди янги ажратилган жойда, замонавий шарт-шароитлари билан, ибодат қилувчилар учун ҳар томонлама қулай қилиб қайтадан барпо этилади. Тадбир анъанавий тарзда Қуръон тиловати билан бошланди. Масжидга дастлабки ғиштни Тошкент вилояти бош имом-хатиби Хайруллоҳ домла Турматов ҳамда эл ичра ҳурматга сазовор бўлган нуроний отахонлар қўйиб бердилар.

Ғишт қўйиш маросими шу ишга ташаббускор бўлган, фидокорлик билан меҳнат қилаётган, холис хизматда камарбаста бўлганлар алоҳида эътироф этилди. Юрт тараққиёти, дин ривожи, мамлакатимиз келажаги, халқимиз фаровонлигини сўраб хайрли дуолар қилинди.