Россия бош вазири Михаил Мишустин ўринбосарлари билан ўтган тезкор йиғилишда коронавируснинг Россияда тарқалишига қарши кураш бўйича миллий режа тасдиқланганини айтган. 

Ҳукуматнинг 31 январда имзолаган қарорига кўра, 2019-nCoV коронавируси одамларга хавф солувчи касалликлар қаторига киритилган. Шу сабабли, коронавирус билан касалланган чет элликлар мамлакатдан депортация қилиниши мумкин.

“Бу режа хорижий фуқароларда коронавирус аниқланса, уларни депортация қилишга ва махсус чекловлар, жумладан карантин ёки изоляция киритишга имкон беради”, деб айтган Бош вазир.  

Унинг таъкидлашича, вазият назорат остида қолмоқда ва Россияда янги вирусга қарши курашиш учун барча зарур дори-дармон ва воситалар етарлича миқдорда бор. 

“Хитой фуқароларининг чегарамиз орқали ҳаракатланиши чекланди. Хавфли вирус аниқланган беморлар ажратиб қўйилган, шифокорлар уларга барча зарур ёрдамни кўрсатмоқда”, деб таъкидлаб ўтган Мишустин.

Охирги маълумотларга кўра, ҳозирда Хитойда вирус қурбонлари сони 425 нафарга етди, у билан касалланганлар сони эса 20438 нафарни ташкил қилмоқда.