Греция ҳукумати пойтахт минтақасидаги энг эски намозхоналардан бири ҳисобланувчи “Андалус”ни ёпишга қарор қилди, дея хабар беради “Анадолу” агентлиги.
Таълим ва дин ишлари вазирлиги Афина марказидан 12 километр узоқликда жойлашган Пирей шаҳридаги мазкур намозхонанинг лицензияси йўқлигини айтиб, бинонинг бўшатилиши учун 15 кунлик муддат берди.
Греция мусулмонлар уюшмаси баёноти айтилишича, вазирлик мусулмонларга келишиш учун ҳеч қандай имконият қолдирмаган. Уюшма ҳукуматнинг қарорини диний эркинликни бўғиш деб баҳолади.
“Андалус” намозхонаси 1989 йилдан бери ишлаб келаётган эди.
Ўтган йилнинг июнида Греция пойтахти Афинада анча кечикишлардан кейин илк масжиднинг рамзий очилиши ўтказилди. Масжид ҳали ҳам ишга тушмади, унга ҳанузгача имом тайинланмаган. Афина бутун Европада масжиди йўқ ягона пойтахтдир.
