БМТнинг Фаластинлик қочқинларга кўмак агентлиги (UNRWA) маълумотига кўра, Иордан дарёсининг ғарбий соҳилида жойлашган 19 та қочқинлар лагерининг 14 тасида 1200 дан зиёд киши коронавирусга чалингани аниқланган. 

Фаластин ерлари 1948 йилда ишғол қилингандан кейин Ғарбий соҳилда ташкил этилган бу лагерларда 820 минг киши яшайди. 

Фаластин Соғлиқни сақлаш вазирлиги мамлакат бўйлаб 19 494 кишида коронавирус аниқланганини, шундан 14 794 та ҳолат Ғарбий соҳилга тўғри келишини маълум қилди. 

Фаластинлик мутасаддилар Рамаллоҳ шаҳрининг шимолида жойлашган Жалазун қочқинларга лагерида беморлар сони бирданига кўпайиб кетиши мумкинлигидан огоҳлантирди. Тахминан 250 минг м2 майдонда жойлашган мазкур лагерда 16 минг киши яшайди. Бу ерда коронавирусга чалинганлар сони 220 нафардан ошди. 

“Аҳоли сони кўп, шу сабабли вирус тарқалишининг олдини олиш учун ижтимоий масофани сақлашнинг иложи йўқ”, – деди лагердаги Халқ қўмитаси раиси Маҳмуд Муборак “Анадолу” агентлигига берган интервьюсида.