Греция пойтахти Афинада мамлакат усмонийлар салтанатидан мустақиллика эришганидан бери илк бор расман масжид очилиши кутилмоқда. Таълим ва дин ишлари вазирлиги пойтахтдаги ягона масжид кузда очилишини маълум қилди, дея хабар бермоқда “Евроньюс”.
Тахминан 250 минг мусулмон яшайдиган Афина бутун Европада масжиди йўқ ягона пойтахт ҳисобланади. 2007 йилда таклиф қилинган масжид лойиҳаси черковнинг қаттиқ қаршилигига дуч келган эди.
Ниҳоят, 12 йил деганда масжид қурилиши тамомланди. Давлат бюджетидан ажратилган маблағ ҳисобига барпо этилган масжидда бир пайтда 350 киши намоз ўқиши мумкин. Масжиднинг минораси ҳам, гумбази ҳам йўқ.
Афиналик мусулмонлар шу пайтгача кичик намозхоналардан фойдаланиб келишади.
