“Роббингизга бирор нарсани бериши учун эмас, балки рози бўлиши учун ибодат қилинг.
Агар рози бўлса, Ўзининг ҳадялари билан сизларни хайратлантиради”.
Шайх Шаъровий р.а.
Бу воқеага олти йил бўлди.
2013 йил 31 декабрь куни эрталаб участка нозири эшикни тақиллатди. Чиқдим, салом-аликдан сўнг ён қўшним уч соат олдин вафот этганини айтиб, расмиятчилик ишлари учун протокол ёзиб беришимни сўради.
Қўшним ёлғиз ўзи яшайдиган, насроний динига эътикод қиладиган, чамаси 60 ёшлардаги рус миллатига мансуб киши эди. Кўп сигарет чекканидан касал бўлиб шифохонада ётиб чиққан, саломатлиги тикланмаслиги аниқ бўлгани учун уйга олиб келишган эди. Қўшнимдан Юра деган қадрдон дўсти хабар олиб турар эди, айнан ўша тунда ҳам шу дўсти қўшнимни ёнида бўлган экан. Қўшним аёли билан ажрашган, хотини ва учта фарзанди чет элга кучиб кетишган эди. Йилда бир-икки марта хат келиб туришидан хабардор эдим.....
Милиция нозири дафн учун ҳужжат тайёрлаш кераклиги, қабристон харажатлари учун маблағ зарурлигини айтгач, орага сукунат тушди. Бир қори акамизга вазиятни тушунтирдим, айни пайтда мени вазифам нимадан иборатлигини сўрадим. Домламиз, насроний бўлса ҳам қўшничилик ҳақи борлигини тушунтириб, дафн маросимини харажатларини тўлиқ бажаришим керак эканлигини айтдилар, фақат уларни ибодатларида қатнашмасдан бир чеккада туришим керак экан.
Бу тавсияга чин дилдан рози бўлдим ва ичкарига кириб Юра амакига вазифамни тушунтирдим. Шу куни расмиятчиликларни (поликлиника+ЗАГС+дафн идораси+ғассол масалаларини) ҳал қилиб, эртасига, яъни 1- январь куни соат 12-00 да Ўрта Чирчиққа (Ўрта Сарой), 3-қабристонга олиб бориб дафн қилдик.
Ўша пайтда қилган ишимдан хурсанд бўлдим, ич-ичимдан қувониб юрдим, шу ёшимда қўшничилик ҳақини тўлиқ адо этишимга қодир қилган Роббимга ҳамд айтдим (аслида қўшним тирик бўлган пайтида ҳам тансиқ таомлар билан йўқлаб турар эдик).
Орадан бир ҳафтача вақт ўтди. Юра амаки телефон қилиб, марҳумни 10 кунлик маросимига таклиф қилди. Маросимда спиртли ичимлик ичилишидан хабарим бор бўлгани учун бормадим, бироқ бир кафеда кутиб ўтиришганини айтишгандан кейин, боришга мажбур бўлдим.
Салом-аликдан сўнг Юра амаки менга қайта-қайта раҳмат айтди ва қўшнимни хориждаги фарзандлари қилган хизматимдан таажжубда эканлигини, айнан мусулмон қўшни насроний отасини дафн қилишда фаол бўлганидан миннатдорлигини билдирди. Ва буни мукофоти қилиб қаровсиз қолган қўшнимни уйини менга беришмоқчилигини билдирди.
Дахшат!!!
Устимдан биров сув қуйгандек бўлди.
Ўтирган жойимда кўздан ёшни тўхтатиб бўлмади.
“Ё Роббий, бу ишимни холис Ўзинг учун қилганимга Ўзинг гувоҳсан, буни мукофотини бунчалик тез ва бунчалик кўпайтириб бердинг...”
Шу ҳолатдаги ички кечинмаларимни бошидан ўтказган киши яхши билади. Шу 10 кунлик вақт ичида қўшнимнинг учта фарзандини “Одно” тармоғи орқали қидирган эдим.
Ўзимнинг саҳифамга ҳам, “Общество Почиваловы" гуруҳига ҳам қуйидаги хабарни қолдирган эдим:
“Тошкентда Почивалов Григорий вафот этди. Тахминан 20.000$лик уйи қаровсиз қолди. Житомирда (Украина) фарзандлари бор. Уларга шу хабарни етказишда ёрдам беринг...”
Бир томонда мен уйни меросхўрларига етиб боришини ўйласам, иккинчи томонда меросхўрлар уйни менга беришга келишиб олишган экан. Аллоҳнинг иродаси билан уй мени номимга ўтказилди. Аллоҳга қасамки, заррачалик мақсадим БУ бўлмаган эди.
Ризқ ҳақида билганим ва хотиржам бўлганим шуки, Сизга ёзилган ризқ албатта етиб келар экан. Энди уни эгаси ҳалол йўл тутадими, макр-ҳийла йўлини тутадими, бу ўзининг ихтиёри...
Бу ҳақда ўқинг:
Янги йил дастурхони...
Хулоса
Ўйлаб қарасам, 1-январь куни айнан насроний кишилар ичидан «ҳушёр» одамни топиш қийин масала!
Юра амаки дўстини сўнгги йўлга кузатиш учун Янги йил кечасида ичмаган экан.
Мусулмонлар ўз Валийсига содиқ бўлиш пайти келмадими?
Менимча, КЕЛДИ...
Абдувоҳид Атаметов
