1905 йилнинг 21 июлида Истанбулда усмонийлар султони Абдулҳамид II га суиқасд уюштирилган эди. Суиқасд “Ҳамидия” масжидининг олдида содир бўлди.
Шарқий Анадолу ҳудудида мустақил арман давлати барпо этишни истаган “Арман инқилобий федерацияси” деб аталувчи радикал гуруҳ султон Абдулҳамидни ўлдиришни режалаштирган эди.
Бунинг учун 120 килограмм портловчи модда бир от аравага жойлаштирилди, султоннинг масжиддан ўз аравасигача қанча вақтда (1 дақиқаю 42 сония) етиб бориши ҳисоблаб чиқилди. Портлашнинг таъсирини орттириш учун портловчи моддага металл парчалари аралаштирилди.
Бироқ шайхулсилом Жамолиддин Афандининг савол сўраши туфайли султоннинг масжиддан ташқарига чиқиши кечикди ва у портлашда ҳеч қандай зарар кўрмади. Портлаш оқибатида 26 киши ҳалок бўлди, 58 киши яраланди.
Суиқасдни уюштиришда етакчилик қилгани аниқланган Бельгия фуқароси Эдвард Жорис икки йиллик ҳибсдан кейин озодликка чиқарилди.
