Хабарингиз бор, жорий йилнинг 24 октябрь куни бўлиб ўтган Ўзбекистон Республикаси Президенти сайловида 80,12 фоиз овоз олган Шавкат Мирзиёев иккинчи муддатга Ўзбекистон Республикаси Президенти этиб сайланган эди. ТАСС ахборот агентлигининг хабар беришича, Шавкат Мирзиёев расман 6 ноябрь, шанба куни ўз лавозимига киришади.
Маълум қилинишича, инаугурация Сенатнинг (парламент юқори палатаси) янги биносида бўлиб ўтади, уни безаш ишлари эндигина якунланмоқда. Охирги марта бу каби маросим 2016 йил 14 декабрда маросим Қонунчилик палатаси (парламент қуйи палатаси) биносида бўлиб ўтган.
«Шавкат Мирзиёевнинг инаугурацияси шанба куни бўлиб ўтади. Унда парламентнинг юқори ва қуйи палаталари аъзолари ҳамда республика ҳукумати аъзолари, шунингдек, дипломатик корпус вакиллари иштирок этиши кутилмоқда», — дея иқтибос келтирилади хабарда.
Маросимда МСК раиси Зайниддин Низомхўжаев Мирзиёевга президентлик гувоҳномасини топшириши кутилмоқда. Қасамёд қабул қилганидан сўнг унга шу йил октябрь ойида таъсис этилган президентлик ҳокимиятининг ўзига хос белгилари — кўкрак нишони ва штандарти ҳам топширилади.
Маълумот учун: инаугурация (лотинча inauguro — бағишлайман) давлат бошлигининг шу олий лавозимини бажаришга киришиши муносабати билан ўтказиладиган тантанали маросим ҳисобланади.
