Кеча, 3 февраль куни Саудия Арабистонининг Жидда шаҳрида Ислом ҳамкорлик ташкилоти (ИҲТ)нинг фавқулодда йиғилиши бўлиб ўтди, дея хабар бермоқда “Анадолу” агентлиги. 

Йиғилишда ташкилотга аъзо давлатларнинг ташқи ишлар вазирлари қатнашди ва унда АҚШ президенти Дональд Трампнинг Фаластин – Исроил низосини ҳал этишга қаратилган “тинчлик режаси” муҳокама этилди.   

Йиғилишдан сўнг эълон қилинган баёнотда ИҲТга аъзо давлатлардан Трампнинг “тинчлик режаси”ни амалга ошириш ишларида ҳамкорлик қилмаслик сўралди. Таъкидланашича, мазкур режада Фаластин халқининг қонуний ҳуқуқлари ва истаклари ҳатто минимум даражада ҳам эътиборга олинмаган ҳамда Трампнинг режаси аввалги тинчлик музокараларига зиддир. 

“Трампнинг тинчлик режасини тамомила рад этамиз”, – дейилади баёнотда. 

Шунингдек, баёнотда Исроил босиб олган Фаластин ерларини тарк этмагунча Яқин Шарқда тинчлик ва хавфсизликни таъминлашнинг иложи йўқлиги таъкидланган.